أنا “جبهة” وتسقط الحرب بت الانقلاب

حين لم يجد العسكر من يصارعونه دوروها حرب. ما حدث في 15 ابريل كان هو المولود الشرعي لما جرى في 25 اكتوبر الحرب بت الانقلاب ما في ذلك شك تلك هي الحقيقة غير القابلة للنقض

ما حدث لديسمبر الثورة يشبه تماماً ما حدث للصحابة في معركة احد حين انشغلوا بجمع الغنائم ظننا اننا غنمنا من المدنية والحرية ما يكفينا للعبور والانتصار المهم ده حنك اكل عليه الدهر وشرب الان نحن مشروقين بحرب وبنفتش لطريقة تمرقنا منها

العبد لله داعم لما يجري في اديس وللجبهة المدنية التي اري ان في تشكيلها الخطوة الاولي لقصف جبهة الحرب و عارف ممكن ينط لي زول ويقول لي البجرب المجرب حاقت به الندامة لكن مقارنة تجربة حكومة قوى التغيير بتجربة حكومة الانقلاب الحرب تخليك تمشي تحضن حمدوك وتسلم على مدني عباس في راسه ياخ تردد على مسامع صلاح مناع شكراً جزيلاً

انا ادعم الجبهة المدنية لايقاف الحرب عشان مقولة أن اجمل ما في الحرب نهايتها

ادعم ناس اديس ابابا لأجل عيون من هم في الخرطوم لاجل قلوب المبعدين عن مدينتهم ادعم الجبهة لانني اشتقت للحياة قريبا من مستشفي الخرطوم ولمستشفى الخرطوم

ادعم الجبهة المدنية عشان ناس غسيل الكلى يلقوا سيور ادعمها عشان واحشني صوت شفع الروضة البصحوني من النوم وهم بشاكلوا في نشيد العلم اي بشاكلو فيه عديل وبنهروه

ادعم ايقاف الحرب عشان اشتقت لهلا والاذاعة والعمارة الكويتية وشارع النيل ادعمها عشان النيل ذاتو بيكون قائلنا رحلنا الصحراء الكبرى وباتت امواجه تردد وين الحلوين وين راحو ؟ ادعمها عشان نلقانا بعد توهان نصف.عام

ادعمها عشان اهل الجنينة والابيض ومدني وكوستي والفاشر ونيالا والضعين ادعمها عشان تقلل الحمل من ناس استقبلوا ناس في بيوتهم وغالبهم يقولوا فترنا

ادعمها عشان نحنا ذاتنا ترنا من بل بس وجغم بس وعشان زهجنا من صفحات الفيسبوك المليانة فلول واشاوس ادعمها عشان زهجنا من فلان مرق ووصل بورتسودان ومن ترديد عبارة جدة اخير

ادعمها عشان الجياشة ذاتهم حتي الذين مهنتهم الحرب يكرهونها

ادعم الجبهة عشان بصراحة بلابسة الفيسبوك والتيكتوك والواتساب لا يمكن لشخص سوي ان يتعايش معهم اكثر من ستة شهور وصراحة كدة ادعمها عشان نرجع للصحافة البنعرفها

للاسف انا ادعم الجبهة من اجل ان تعود الحياة لمقابر احمد شرفي البكري وحمد النيل نحن شعب حتي دفن الموتى عنده طقوس حياة

ادعم الجبهة لاجل ان يعود سودان ديسمبر بالمواكب وبلجان المقاومة بباشدار و بري و الاربعين والستين

ادعمها لاجل ان اعود لقراءة بيانات الحزب فقد وحشتنا عبارة تسقط تالت ادعمها لأجل ان يجد حزب البعث جدار يكتب فيه شعارات الثورة ويدعم القضية الفلسطينية

انا ادعم خطوات الجبهة المدنية من أجل اسقاط المليشيا وعودة العسكر للثكنات ادعم الجبهة لانه طوال ما هناك حرب هناك امر واقع اسمه البرهان وحمدان المليشيا التي كانت تخاف ان تسقطها الهتافات هاهي تتمدد بفعل الدانات

انا ادعم الجبهة المدنية لايقاف الحرب حتى يتم تمزيق اقامة الطوارئ في الامارات عشان من لا يملك وطنه لا يملك موقفه

انا ادعم الجبهة من اجل اعادة قونات السودان للسودان وعشان نرجع نحنا نسمعهن جوة بيوتنا

انا ادعم جبهة ايقاف الحرب حتى نقطع الطريق على فرتقة ما تبقي من البلد ادعمها لأجل ان يعود الينا سودان الصادق سمل وام قصي والسيدة وداد ام الشهيد المحجوب انا ادعم ايقاف الحرب لان جبهة فيها حمدوك ومدني وخالد عمر والنور حمد ومحمد الفكي وصديق الصادق لا يمكن مقارنتها بجبهة فيها كرتي وهارون و ناس فلان و فلانة

انا ادعم الجبهة المدنية لايقاف الحرب عشان عاوز اجابة على سؤال يا جماعة المخلوع السقطناه داسنو وين ؟

ضد الحرب ولازم تقيف

نبقي حزمة فلا مهزلة يمكن ان يشهدها وطن مثل ان تحطم الدانة اشلاء الصغار بينما ينشط الكبار خدمة الانترنت عشان يكتبوا في صفحاتهم “بل بس”.

الزين عثمان